ദേശീയ രാഷ്ട്രീയത്തിലേക്ക് നിതീഷ് കുമാർ; ഇന്ന് രാജ്യസഭാംഗമായി സത്യപ്രതിജ്ഞ ചെയ്യും, ബിഹാർ മുഖ്യമന്ത്രിയെ 13-ന് നിശ്ചയിക്കും

പട്ന: ബിഹാർ രാഷ്ട്രീയത്തിൽ ഒരു യുഗത്തിന് അന്ത്യം കുറിച്ചുകൊണ്ട് മുഖ്യമന്ത്രി നിതീഷ് കുമാർ ഇന്ന് രാജ്യസഭാംഗമായി സത്യപ്രതിജ്ഞ ചെയ്യും. അദ്ദേഹം സ്ഥാനമൊഴിയുന്നതോടെ ബിഹാറിന്റെ പുതിയ മുഖ്യമന്ത്രിയെ തിരഞ്ഞെടുക്കുന്നതിനായുള്ള ബി.ജെ.പി നേതൃയോഗം ഏപ്രിൽ 13-ന് പട്നയിൽ ചേരും. രാജ്യസഭയിലേക്ക് തിരഞ്ഞെടുക്കപ്പെട്ടതിനെത്തുടർന്ന് മാർച്ച് 30-ന് അദ്ദേഹം ബിഹാർ നിയമനിർമ്മാണ കൗൺസിൽ (MLC) അംഗത്വം രാജിവെച്ചിരുന്നു.

പുതിയ മുഖ്യമന്ത്രിയായി നിലവിലെ ഉപമുഖ്യമന്ത്രി സമ്രാട്ട് ചൗധരി വരണമെന്ന നിർദ്ദേശം നിതീഷ് കുമാർ മുന്നോട്ടുവെച്ചതായാണ് റിപ്പോർട്ടുകൾ. കൂടാതെ, നിതീഷിന്റെ മകൻ ഉപമുഖ്യമന്ത്രി പദവിയിലേക്ക് എത്തിയേക്കുമെന്ന സൂചനകളും പുറത്തുവരുന്നുണ്ട്. എന്നാൽ, എൻ.ഡി.എ സഖ്യത്തിനുള്ളിൽ മുഖ്യമന്ത്രി പദത്തെ ചൊല്ലി തർക്കങ്ങളുണ്ടെന്ന വാർത്തകൾ ബി.ജെ.പി സംസ്ഥാന അധ്യക്ഷൻ നിതിൻ നബിൻ നിഷേധിച്ചു.

സത്യപ്രതിജ്ഞാ ചടങ്ങിൽ പങ്കെടുക്കാൻ ബിഹാർ ഉപമുഖ്യമന്ത്രിമാരായ വിജയ് കുമാർ സിൻഹയും സമ്രാട്ട് ചൗധരിയും ഡൽഹിയിലെത്തിയിട്ടുണ്ട്. ബിഹാറിൽ ഏറ്റവും കൂടുതൽ കാലം മുഖ്യമന്ത്രിയായിരുന്ന നിതീഷ് കുമാർ ദേശീയ രാഷ്ട്രീയത്തിലേക്ക് ചുവടുമാറ്റുന്നതോടെ കേന്ദ്ര മന്ത്രിസഭയിൽ വലിയ അഴിച്ചുപണിക്ക് സാധ്യതയുണ്ടെന്നാണ് വിലയിരുത്തപ്പെടുന്നത്. 13-ന് പട്നയിൽ നടക്കുന്ന യോഗത്തിൽ കേന്ദ്ര നേതൃത്വത്തിന്റെ നിലപാടുകൾ കൂടി പരിഗണിച്ചാകും അടുത്ത മുഖ്യമന്ത്രിയുടെ കാര്യത്തിൽ ഔദ്യോഗിക പ്രഖ്യാപനമുണ്ടാവുക.